Tuesday, November 8, 2016

കലികാലവിളയാടലുകൾ

ദേവലോകത്തു ആകേ ആശങ്കയാണ് . കലിയുഗം അവസാനിക്കാൻ ഇനിയും കൊല്ലവര്ഷങ്ങൾ ഏറേ കിടക്കുന്നു പക്ഷേ മനുഷ്യൻ റോക്കറ്റിന്റെ സ്പീഡിൽ ആണ് പാപങ്ങൾ ചെയ്തു കൂട്ടുന്നത് . കൽക്കിയുടെ അവതാരം പ്രീപോണ് ചെയ്യാൻ പറ്റുമോ എന്ന് ചോദിയ്ക്കാൻ ഭഗവാൻ വിഷ്ണുവിന്റെ മുന്നിൽ എല്ലാ ദൈവങ്ങളും എത്തിയിട്ടുണ്ട് . പ്ലാനുകൾ തെറ്റിക്കുന്ന ആൾ അല്ല പുള്ളിക്കാരൻ പക്ഷേ എന്ത് ചെയ്യാം ലോകനാശം സംഭവിച്ചതിനു ശേഷം കൽക്കി ആയി വന്നിട്ട് വേണം ട്രോളന്മാർ കൽക്കിയെ കേരളാ പോലീസിനോട് ഉപമിക്കാൻ . കൂലംകൃശമായ ചിന്തകൾക്ക് ഒടുവിൽ ഇപ്പോഴത്തെ സ്റ്റാറ്റസ് അറിയാൻ ഒരു ദൂതനെ വിടാം എന്നായി തീരുമാനം . വോട്ടിംഗ് ആരംഭിച്ചു , എസ്. എം.എസ് വോട്ടിങ്ങിൽ രാമ ഭക്തൻ ഹനുമാൻ നാരദനെ തോൽപ്പിച്ചു . അങ്ങനെ മലയാള വര്ഷം 1192 തുലാം 24'നു സമയം 11 മണിക്ക് ആഞ്ജനേയൻ എ.കെ.എ ഹനുമാൻ സുൽത്താൻപേട്ട ജംക്ഷനിൽ പ്രത്യക്ഷപെട്ടു .

കുരങ്ങനെ പോലേ വേഷം ധരിച്ച ഒരാളേ കാണാൻ ആൾക്കാർ വാഹനം സ്ലോ ചെയ്തു, ചിലർ ഹോൺ അടിച്ചു ആവേശം പ്രകടിപ്പിച്ചു . ചില ഫ്രീക്കൻ പിള്ളേർ ഹനുമാനെ ബാക്ക്ഗ്രൗണ്ടിൽ ആക്കി ഒരു സെൽഫി എടുത്തു ഫേസ്‌ബുക്കിൽ ഇട്ടു വൈറൽ ആക്കി . ട്രാഫിക് ജാം ഉണ്ടാക്കിയതിന്
 കർമധീരനായയ്‌ കോൺസ്റ്റബിൾ കുട്ടൻ പിള്ള ഹനുമാന് ഒരു പെറ്റി അടിച്ചു കൊടുത്തു . ഇതേ സമയം അങ്ങ് കൽപ്പാത്തി അഗ്രഹാരത്തിൽ പൂജാകര്മങ്ങള്ക്കു ഇടയിൽ ഒരു അശരീരി കേട്ടു. അശരീരി ഫിനിഷ് ചെയ്യും മുൻപേ  'ഹനുമാൻ പാലക്കാടിൽ  വറ പോരാൻ ,  ഹനുമാൻ പാലക്കാട്ടിൽ വന്താച്ചു , എല്ലാവരും വാങ്കോ' എന്ന് വിളിച്ചു കൂവി കുടുമ പറത്തി കൊണ്ട് ഗണേഷ് അയ്യർ ബൈക്കിൽ പാഞ്ഞു . അശരീരി കേട്ടവർ കേൾക്കാത്തവർ ഫേസ്‌ബുക്കിൽ കണ്ടവർ ലൈക് അടിച്ചവർ എല്ലാവരും ഹനുമാൻ ഒറിജിനൽ ആണോ എന്നറിയാൻ സുൽത്താൻപേട്ടയിലേക്കു വെച്ച് പിടിച്ചു .

ഇതേ സമയം Mr. ആഞ്ജനേയൻ ഗദയും തൂക്കി മന്ദം മന്ദം ടിപ്പുവിന്റെ കോട്ടയിലേക്ക് നടക്കുകായാണ്.  സംഭവം പുള്ളിക്ക് ഒരു ജമ്പിനു ഉള്ളതേ ഉള്ളു എന്നാലും നാടും പരിസരവും ഒക്കെ ഒന്ന് കാണാം എന്ന ആഗ്രഹം ആവും ഇങ്ങനെ നടന്നു പോകാൻ ഉള്ളതിന്റെ പിന്നിലേ  രഹസ്യം . അങ്ങനെ ഓരോ അടി മുന്നോട്ടു വെയ്ക്കുന്തോറും പിന്നിലേ ജനപ്രവാഹം വർദ്ധിച്ചു വർദ്ധിച്ചു വന്നു.  ടിപ്പുവിന്റെ കോട്ടയുടെ അകത്തു ഉള്ള ഹനുമാൻ കോവിലിന്റെ മുന്നിൽ എത്തിയപ്പോൾ അദ്ദേഹം തിരിഞ്ഞു നിന്ന് ജനപ്രവാഹത്തെ നോക്കി തെല്ലു മന്ദഹാസത്തോടെ കൈ കൂപ്പി പ്രണമിച്ചു . അവിടേ കണ്ട ഒരു പാറക്കല്ലിൽ ഉപവിഷ്ടനായി കണ്ണടച്ച് തപസ്സു ആരംഭിച്ചു .

ജയ് ശ്രീ രാം .... ജയ് ശ്രീ രാം .... ജയ് ശ്രീ രാം..

ഈ മന്ത്രോച്ചാരണത്തിൽ ജനം നിശബ്ദമായി. ഇതേ സമയം ദില്ലിയിൽ നിന്നും അജിത് ഷായും സംഘവും ഹനുമാനെ കാണാൻ ഹെലികോപ്റ്ററിൽ പുറപ്പെട്ടിട്ടുണ്ട് എന്ന് ദില്ലിയിൽ നിന്നും നിഷാന്ത് രഘുവംശം അറിയിച്ചു. "ഇന്ത്യ വാൻറ്സ് റ്റു നോ" ചാനെൽകാരൻ ഹനുമാനെ അയാളുടെ ചാനലിൽ വരാൻ വെല്ലു വിളിച്ചു. അങ്ങ് അമേരിക്കൻ മീഡിയയിൽ യു. എഫ്. ഓ ഏലിയൻ അപ്പിയർസ് ഇൻ ഇന്ത്യ എന്ന് പറഞ്ഞു ഫ്രീക്കന്മാരുടെ കൂടേ ഉള്ള ഹനുമാന്റെ സെൽഫി പ്രചരിപ്പിച്ചു . ഈ കാണുന്നത് അമേരിക്കയുടെ ബഹിരാകാശ പരീക്ഷണങ്ങളുടെ പരാജയം ആണെന്ന് റഷ്യൻ പ്രസിഡന്റ് അപലപിച്ചു കൂട്ടത്തിൽ ഇന്ത്യയെ പുകഴ്‌ത്തുകയും ചെയ്തു  . ഇതേ സമയം ഇതിനു പിന്നിൽ ഇന്ത്യൻ പ്രധാനമന്ത്രിയുടെ പിടിപ്പുകേടാണ് എന്ന് ദില്ലി മുഖ്യമന്ത്രി ചുഴലിവാൾ പത്രസമ്മേളനത്തിൽ അറിയിച്ചു .

താൻ കേരള മുഖ്യമന്ത്രി ആയിരിക്കും കാലത്തു തന്നോട് ചോദിക്കാതെ പ്രത്യക്ഷപ്പെട്ടത് ഒരു തരം കുലം കുത്തി ഏർപ്പാട് ആയി പോയി എന്ന് കൈതേരി സഹദേവന്റെ ചെവിയിൽ  ഇളയരാജന്മാർ ഓതി. ഓനോട്‌ ക്ലിഫ് ഹൊസ്സിലേക്കു ഉടൻ വരാൻ ഉത്തരവ് പുറപ്പെടുവിച്ചു. രാജകല്പന അറിഞ്ഞ ഹനുമാൻ തലസ്ഥാനത്തേക്കു പറന്നു . ഹനുമാനെ വിളിച്ചു കേറ്റി സൽക്കരിച്ചതു ഹൈന്ദവ പ്രീണനം ആണെന്ന് സുരേഷ് എണ്ണത്തല ഫോൺ സന്ദേശം വഴി റിപ്പോർട്ടർ ചാനലിനെ അറിയിച്ചു . ഇതേ സമയം കണ്ണൂരിൽ ചെഗുവേരയുടെ ടീ ഷർട്ട് ഇട്ട ഹനുമാന്റെ കട്ട് ഔട്ട് പൊങ്ങി വന്നു , ഇത് കണ്ടു ആക്രോശിച്ചു സംഘികൾ ചേർന്നു ഒരു മാക്രിയേ തട്ടി . സൂര്യൻ അസ്തമിച്ചില്ല അതിനു മുൻപ് മാക്രികൾ പകരം വീട്ടി ഫൈനൽ സ്കോർ 1-1 . ബാക്കി ഒരു ഹർത്താലിന് ശേഷം കണ്ടിന്യു ചെയ്യാം എന്ന് ഇരു പാർട്ടിക്കാരും സമ്മതിച്ചു .



ഹനുമാൻ ഈസ് സൊ കൂൾ എന്ന് കരുതുന്ന ചില സ്ത്രീരൂപങ്ങൾ ഹനുമാന്റെ കൂടേ നിന്ന് ഫോട്ടോ എടുക്കാൻ ഹനുമാനെ അപ്പ്രോച്ച് ചെയ്യുകയാണ് . പക്ഷേ ലൈഫ് ലോങ്ങ് ക്രോണിക് ബാച്ചലർ ആയ ഹനുമാൻ ആ ഓഫർ നിരസിക്കുന്നു . വെറും ഫോട്ടോ എടുക്കാൻ സമ്മതിക്കാത്ത ഇവനെ കെട്ടിയിട്ടു ഒരു ഫാമിലി ഫോട്ടോ എടുത്തിട്ടേ വീടു എന്ന് തീരുമാനിച്ചു  ശ്രീ കോമളവല്ലി അന്തർജ്ജനം ട്വിറ്ററിൽ #ReadyToMarry #SelfieFreedom എന്ന ഹാഷ്ടാഗുകൾ ആരംഭിക്കുന്നു . സ്ഥലത്തെ പ്രധാന ബുദ്ധിജീവികളും ഈച്ച ആട്ടി ഇരിക്കുന്ന ചാനലുകാരും ചേർന്ന് ഇതൊരു സെൻസേഷൻ ആക്കുന്നു . കാര്യങ്ങൾ പന്തി അല്ല എന്ന് അറിഞ്ഞു അജിത് ഷാ ഹെലികോപ്റ്റർ ഭോപ്പാലിൽ നിർത്തുന്നു. ഇത് കണ്ട  കേരളാ സർക്കാർ ശ്രീ കോമളവല്ലിയെ പ്രശംസിക്കുന്നു അതിലുപരി അവരേ ഹൈ കോടതിയിൽ സപ്പോർട്ട് ചെയ്യുന്നു . അദ്ധ്വാനിക്കുന്ന ജനവിഭാഗത്തിന്റെയും സ്ത്രീകളുടെയും കൂടെയാണ് എന്ന് സോഷ്യലിസ്റ്റ് പാർട്ടി ഉള്ളത് എന്ന് കച്ചൂരി പത്രപ്രവർത്തകരോട് അറിയിക്കുന്നു . അവസാനം വൃശ്ചികം 21, 1192'നു പത്തിനും പതിനൊന്നിനും ഇടയ്ക്കു ഹനുമാന്റെയും കോമളവല്ലിയുടെയും വിവാഹം ഉറയ്പ്പിക്കുന്നു.  കോടതിയുടെ തീരുമാനം എതിർക്കുന്നവരെ പോലീസിനെ വെച്ച് നേരിടും എന്ന് കൈതേരി വെല്ലു വിളിക്കുന്നു .

ഗത്യന്തരം ഇല്ലാതെ ഹനുമാൻ ഭഗവാൻ വിഷ്ണുവിന് S. O. S അയച്ചു  , വന്നതിലും വേഗത്തിൽ അപ്രത്യക്ഷൻ ആവുകയും ചെയ്തു . തിരിച്ചു ദേവലോകത്തു എത്തിയിട്ട് ദേവേന്ദ്രനെ കാര്യങ്ങൾ ബോധിപ്പിക്കുന്നു . ഒന്നല്ല പതിനൊന്നു കൽക്കി എങ്കിലും വേണ്ടി വരും എന്നൊരു റഫ് എസ്റ്റിമേറ്റ് ഭഗവാൻ വിഷ്ണുവിനെ ഏൽപ്പിക്കുന്നു . ഭഗവാൻ ഒട്ടും ആശങ്കയില്ലാതെ അത് അപ്പ്രൂവ് ചെയ്യുകയും ചെയ്തു .

~~~~~~~~~~~~~~~~~~~~~~~ശുഭം~~~~~~~~~~~~~~~~~~~~~~

അടിക്കുറിപ്പ് : ഈ കഥയിലെ കഥാപാത്രങ്ങൾക്ക് ജീവിച്ചിരിക്കുന്നവരോ മരിച്ചവരുമായോ സാദൃശ്യം തോന്നുന്നുണ്ടെങ്കിൽ  അത് തികച്ചും യാധൃശ്ചികം മാത്രം .


Sunday, November 6, 2016

ആർക്കൊപ്പം അമേരിക്ക ( ഡെലാവെർ )

ശ്രീജിത്തേട്ടന്റെ മെസ്സേജിൽ നിന്നാണ് തുടക്കം , ഏഷ്യാനെറ്റിൽ ചേട്ടന്റെ സൃഹുത്തു കൃഷ്ണകിഷോർ സിന്ധു സൂര്യകുമാർ ഒത്തു 'ആർക്കൊപ്പം അമേരിക്ക' എന്നൊരു പ്രോഗ്രാം നടത്തുന്നു . ഡെലാവെറിൽ നടത്താൻ പറ്റുമോ എന്നാണു ശ്രീജിത്തേട്ടന് അറിയേണ്ടത് . ഡെൽമ ഡെലാവെറിൽ താജ്മഹൽ പണിയുമോ എന്ന് ചോദിച്ചാൽ പോലും അത് പറ്റും എന്നേ ഞങ്ങടെ പ്രസിഡന്റ് മനോജേട്ടനും വൈസ് പ്രസിഡന്റ് ജോസേട്ടനും പറയു . ഡെൽമയെ സംബന്ധിച്ചിടത്തോളം രണ്ടു പേരും കച്ച കെട്ടി ഇറങ്ങിയവർ ആണ് . മറ്റുള്ള മലയാളി സംഘടനകൾ എങ്ങനെയാണ് എന്ന് അറിയില്ല , പക്ഷേ ഡെൽമ ഒരു ചോട്ടാ സ്റ്റേറ്റിലെ ഏക സംഘടന ആണ് . ഞാൻ ഉൾപ്പടെ ഉള്ള ഇവിടത്തെ പല മലയാളികളും ഭൂലോക മടിയന്മാരും ശുഷ്‌കാന്തി ഇല്ലാത്തവരും ആണ് താനും . അത് കൊണ്ട് തന്നേ പല പ്രോഗ്രാമിനും ആളേ കിട്ടാറില്ല . ഈ പോക്ക് പോയാൽ നമ്മുടേ പ്രോഗ്രാം കാണാൻ നാട്ടിൽ നിന്ന് ബംഗാളികളേ ഇറക്കേണ്ടി വരുമോ എന്ന് വരേ തോന്നി പോകും . പക്കേങ്കിൽ ശ്രീജിത്ത് ഏട്ടനും , പപ്പേട്ടനും , ചാണ്ടിച്ചായനും കട്ടയ്ക്കു സപ്പോർട്ട് ചെയ്യുന്നത് കണ്ടപ്പോൾ തോന്നി സംഭവം ചിലപ്പോ മിന്നിക്കും .

അങ്ങനെ നവംബർ മൂന്നാം തിയതി വൈകീട്ട് ഏഴു മണിക്ക് പ്രോഗ്രാം സെറ്റ് ചെയ്തു . ഈ പ്രാവശ്യം അമേരിക്കൻ ഇലക്ഷൻ അന്യായ കോമഡി ആയതു കൊണ്ട് ട്രോള് ഏതാണ് ന്യൂസ് ഏതാണ് എന്ന് അറിയാൻ പാടില്ലാത്ത ഒരു അവസ്ഥ ആ
ണ് . സിന്ധുവിന്റെ പല പ്രോഗ്രാം ടീ.വീയിൽ കണ്ടിട്ടുണ്ട് , ആളൊരു പുലി അല്ല സിംഗം ആണ് സിംഗം എന്ന് അറിയാവുന്നതു കൊണ്ട് ചെറിയ ഒരു പേടി ഉണ്ടായിരുന്നു . ഇവർ ഞങ്ങടെ രാഷ്ട്രീയ അറിവില്ലായ്മ പച്ചയ്ക്കു കൊളുത്തുമോ പളനി ആണ്ടവ? എന്നാലും ഇവിടെത്തെ മലയാളികളുടെ മനസ്സിൽ എന്താണ് എന്ന് കൂടേ അറിയാം ഓസിനു ടീവിയിൽ പടം വരുമല്ലോ എന്നോക്കെ കണക്കു കൂട്ടി ഞാനും ആൽവിൻ ഭായിയും കൂടെ വെച്ച് പിടിച്ചു .

അവിടേ എത്തിയപ്പോൾ കണ്ടത് , സ്ഥലത്തെ പ്രധാന വില്ലന്മാരൊക്കെ എത്തിയിട്ടുണ്ട് . കോട്ടിട്ടവർ കൊട്ടിടാത്തവർ കോട്ടുവായ മാത്രം ഇടുന്നവർ അങ്ങനെ അങ്ങനെ . സുനിത ചേച്ചി എന്തൊക്കെയോ ഒരു പേപ്പറിൽ കുത്തി കുറിക്കുന്നുണ്ട് . ജയലളിതയെ പോലെ ആകാശത്തേക്ക് വിരൽ ചൂണ്ടി എന്തൊക്കെയോ പറയുന്നുണ്ട് . ജി ജോസഫ് ചേട്ടൻ റിപ്പബ്ലിക്കൻ പിൻ ഒക്കെ കോട്ടിൽ കുത്തിയിട്ടു ഒരു ഫയൽ ഒക്കെ പിടിച്ചാണ് വന്നിട്ടുള്ളതു . സംഭവം എല്ലാവരും സെറ്റപ്പിൽ ആണ് . ചാച്ചപ്പൻ പതിവ് പോലെ കോട്ട് ഒക്കെ ഇട്ടു  ഇടക്കെ ഇടക്കെ വന്നു എല്ലാവരോടും  അവിടേ കാപ്പി ഏർപ്പാട് ആക്കിയിട്ടുണ്ട് പോയി കുടിക്കാൻ ഓര്മിപ്പിക്കുന്നുണ്ട് . അനിൽ ഏട്ടൻ ഗൗരവത്തിൽ ആണ് , കോളേജ് കാലത്തെ പഴയ രാഷ്ട്രീയക്കാരൻ എങ്ങാനും ആവേശം മൂത്തു മുദ്രാവാക്യം വിളിക്കുമോ ??  പ്രിത്വിരാജിന്റെ പടത്തിനു കൂവാൻ കേറിയ ദിലീപ് ഫാൻസിനെ പോലെ സവീഷും , കിരണും കള്ളലക്ഷണത്തോടെ അവിടേ അലഞ്ഞു നടപ്പുണ്ട് . സ്ത്രീകളുടെ കോറം തികയ്ക്കാൻ എണ്ണം ചില സ്ത്രീ ശക്തികൾ മാത്രം . ക്യാമറ ചേട്ടന്മാരും സൗണ്ട് ചേട്ടന്മാരും കൂടേ എല്ലാം റെഡി ആക്കുന്ന തിരക്കിൽ ആണ് . ദൂരേ നിന്നും സിന്ധുവിനേ കണ്ടു കൂടേ കോട്ടിട്ട ക്ലീൻ ഷേവ് കമലഹാസനെ പോലെ ഉള്ളോരാളെ കണ്ടു അങ്ങൊരു ആയിരിക്കും കൃഷ്ണകിഷോർ . രണ്ടു പേരും റീലാക്സിഡ് ആണ് , കോക്ക് എത്ര കുളം കണ്ടിരിക്കുന്നു എന്ന മട്ടിൽ ആണ് അവരുടേ ഇരിപ്പു .

പരിപാടി തുടങ്ങുന്നതിനു മുൻപ് പ്രോഗ്രാം പ്രൊഡ്യൂസർ അനിൽ അടൂർ ഒരു പ്രോഗ്രാം എങ്ങനെ ആണെന്നും ഇതിൽ നമ്മൾ എന്തോക്കെ മര്യാദ പാലിക്കണം എന്ന് പറഞ്ഞു തന്നു. നല്ല അനുസരണ ഉള്ള പിള്ളേരെ പോലേ ഞങ്ങളും തല കുലുക്കി സമ്മതിച്ചു . അങ്ങനെ ചർച്ചകൾ ആരംഭിച്ചു, പ്രതീക്ഷിച്ചതിലും വിപരീതം ആയിരുന്നു കാര്യങ്ങൾ . മലയാളികൾക്ക് ഇടയിൽ ട്രംപിന് ഭയങ്കര സപ്പോർട്ട് , എല്ലാം വെട്ടി തുറന്നു പറയുന്ന ആരേയും കൂസാത്ത നിലപാട് ആണ് പലർക്കും ഇഷ്ട്ടം . പിന്നേ ചില ഡെമോക്രാറ്റ് സപ്പോർട്ടേഴ്‌സ് ആൻഡ് ട്രംപ് വിരോധികൾ ചേർന്നു കൌണ്ടർ അടിച്ചു തുടങ്ങി . സ്കോർ 2 - 2 ആയി നിൽക്കുകയാണ് , എനിക്ക് വോട്ട് ഇല്ലാത്തതു ഫാഗ്യം അല്ലെങ്കിൽ ആകേ ഡൌട്ട് അടിച്ചു പണ്ടാരം അടങ്ങിയെന്നെ .  പാർട്ടി ബേദമന്യേ ഇവരെല്ലാം നമ്മുടെ സ്വന്തം ആൾക്കാർ ആയതു കൊണ്ട് ഓരോ പോയിന്റും ഞങ്ങൾ കൈ അടിച്ചു പാസ്സ് ആക്കി .  മലയാളിയുടെ പൊളിറ്റിക്കൽ സെൻസ് ചോദ്യം ചെയ്യരുത് എന്ന് അവിടേ നിന്ന് മനസ്സിലായി . രണ്ടു കൂട്ടരും കുറേയേറെ വാലിഡ്‌ പോയിന്റ്സ് വീശി വിതറി സംഭവം അങ്ങോട്ട് ഓളം ആക്കി . സിന്ധുവും കിഷോറും ഡിബേറ്റ് നല്ല കട്ടയ്ക്കു തന്നേ ഹാൻഡിൽ ചെയ്തു എന്ന് പറയാതെ വയ്യ. അവരും വെൽ പ്രീപെർഡ് ആയിരുന്നു എന്ന് തോന്നി . പോരാത്തതിന് പാനെലിസ്റ് ആയി വന്നവരും നല്ല മുട്ടൻ പ്രകടനം ആയിരുന്നു .



പരിപാടി സംപ്രേഷണം ചെയ്തപ്പോൾ ഞാൻ ആരൊക്കെയോ ആയി എന്നൊരു ഫീലിംഗ് , ഒരു സെലിബ്രിറ്റി ആയതിന്റെ വീഡിയോ കണ്ടു പുളകിതൻ ആയി മതി മറന്നു ഇങ്ങനെ ഇരിക്കുമ്പോൾ പൊണ്ടാട്ടി വന്നു കൊച്ചിന്റെ ഡയപ്പർ മാറ്റാൻ ഉത്തരവിട്ടു . അത് കഴിഞ്ഞിട്ട് വേണം വേണം പാത്രം കഴുകാൻ, വീക്കെൻഡ് ഓഫീസ്  സപ്പോർട്ട് , കുന്തം, കുടചക്രം ...  ദാണ്ടെ കിടക്കുന്നു പരിപ്പും പരവതാനിയും ഫേക്ക് സെലിബ്രിറ്റി സ്റ്റാറ്റസും .

നോട്ട് ദി പോയിന്റ് : ഇതെല്ലം എന്റെ വീക്ഷണങ്ങൾ വാൽകഷ്ണങ്ങൾ മാത്രം എല്ലാം ഒരു കോമഡി മാത്രം .