ന്യൂ ഡൽഹിയിലെ ചില പഴയ മനുഷ്യർ

ഇന്നലേ ടീ.വീയിൽ കണ്ടു കുറേ തൊഴിലാളികൾ ഡൽഹിയിൽ നിന്നും യു.പി , ബീഹാർ എന്നിവിടങ്ങളിലേക്ക് പോകാൻ തേനീച്ച കൂട്ടങ്ങളെ പോലെ തിങ്ങി കൂടി നിൽക്കുന്നു. ചിലർ സാഹചര്യം കണ്ടു മോദിയെ , കെജ്‌രിവാളിനെ , ചൈനയെ എല്ലാം മാറി മാറി തെറി വിളിക്കുന്നു. ഈ പറയുന്നവർ ആരും ഇവർ ആരാണെന്നോ ഇവരുടെ ജീവിതം എങ്ങനെ ആണെന്നോ അറിയാത്തവർ ആയിരിക്കും. എന്റെ ഒരു ചെറിയ അനുഭവം വെളിപ്പെടുത്തട്ടെ , എന്റെ ചെറുപ്പത്തിലേ കുറച്ചു കാലം ഞാൻ ഡൽഹിയിൽ ആണ് ചിലവഴിച്ചത് , പിന്നീട് ഇടക്കേ ഇടക്കേ വെക്കേഷൻ ഡൽഹിയിൽ ആയിരിക്കും. ഡൽഹിയിൽ ഞങ്ങളുടെ എല്ലാ ബന്ധുക്കളുടെയും അവരുടെ കൂട്ടുകാരുടെ വീടുകളിലും വീടുപണിക്ക് വരുന്നത് സ്ത്രീകൾ ആയിരുന്നു. മെലിഞ്ഞു ഉണങ്ങിയ ദേഹ പ്രകൃതിയും ചെമ്പൻ മുടിയും ഒരു വല്ലാത്ത ഗന്ധം ഉള്ള ഇവർ ഒരു ദിവസം 5 വീട് വരേ കവർ ചെയ്യും. ഇവരുടെ വരുമാനത്തെ കുറിച്ച് ഞാൻ താഴെ പറയാം. ഇനി ഈ സ്ത്രീകളുടെ ഭർത്താക്കന്മാർ പലരും റിക്ഷ ഓടിക്കുന്നവരോ , കാർ തുടയ്ക്കുന്നവരോ , ഇസ്തിരി ഇടുന്നവരോ, ഹോട്ടലുകളിൽ പാത്രം കഴുകുന്നവരോ ആയിരിക്കും. മിക്കവാറും കുട്ടികളും ഇവരുടെ തൊഴിലിൽ കൂടും , എന്റെ പ്രായം ഉള്ള പയ്യന്മാർ പട്ടിയെ നടത്തുന്നതും , ഇസ്തിരി പെട്ടിക്കുള്ള കനൽ ഉണ്ടാക്കുന്നതും , സൈക്കിളിൽ വീട്ടു സാധനം ഡെലിവർ ചെയ്യുന്നതും ഒക്കെ ഞാൻ കണ്ടിട്ടുണ്ട്.


ഇവർ കുടുംബത്തോടെ ജൂഗ്ഗികളിൽ ആണ് താമസം. ഇംഗ്ലീഷിൽ 'slums' എന്ന് പറയുന്ന പാർപ്പിടങ്ങൾ തന്നേ . തീരേ വൃത്തിഹീനമായ ഒരിടത്തു പന്നിയും മനുഷ്യനും പട്ടിയും പൂച്ചയും ഒക്കെ പെറ്റു പെരുകി ഇരിക്കുന്ന ഒരു തരംതാണ താമസ സൗകര്യം. ഓരോ വെക്കേഷന് പോകുമ്പോളും ഡൽഹിയിലെ റോഡുകൾ നന്നായി , മെട്രോ വന്നു , എന്റെ കുടുംബങ്ങളെ പോലെ ചുറ്റും എല്ലാവര്ക്കും കാർ ആയി വരുമാനം കൂടി , അമ്പലങ്ങൾ പള്ളികൾ ഒക്കെ മോഡി പിടിച്ചു. ജുഗ്ഗികൾ ജുഗ്ഗികൾ ആയി തുടർന്നു. ഇനി ആണ് വരുമാനത്തിന്റെ ഇന്റെരെസ്റ്റിംഗ് സ്റ്റാറ്റിസ്റ്റിക്‌സ് , കേരളത്തിൽ അന്ന് കാലത്തു വീട്ടു ജോലിക്കു ഒരു ദിവസം 100 രൂപയായിരുന്നു ഡൽഹിയിലെ വീട്ടുകാർക്ക് ആവട്ടേ 10 രൂപ. സംശയിക്കേണ്ട 10 രൂപ. ഇനി റിക്ഷ ഓടിക്കുന്നവരുടെ കഥ പറയാം . ഒരു പോയിന്റിനു കേരളത്തിൽ ഓട്ടോയ്ക്കു അന്ന് 15 രൂപ ആയിരുന്നു മിനിമം ചാർജ്, സൈക്കിൾ റിക്ഷയ്ക്കു 1 രൂപ. മയൂർ വിഹാർ എന്റെ വല്യമ്മടെ വീട്ടിൽ നിന്ന് അമ്പലത്തിലേക്ക് റിക്ഷ ചാർജ് 3 രൂപ . ഇസ്തിരി ഇടുന്ന ഒരു ഡ്രെസ്സിനു 1 രൂപ . എല്ലാം കഴിഞ്ഞിട്ട് നിന്നേ ഒക്കേ ഞാൻ ജോലിക്കു നിർത്തുന്നില്ലെടാ എന്നൊരു പുച്ഛവും.

ഇപ്പോൾ ഒരു ഊഹം കിട്ടിയില്ലേ ഈ ജുഗ്ഗികൾ പുരോഗമിക്കാത്തതു എന്ത് കൊണ്ടെന്നു ? ജുഗ്ഗികൾ ജുഗ്ഗികളായി തുടർന്നാൽ മാത്രമേ ഡൽഹിയിലെ ജീവിത ചക്രം ചുളുവിൽ ഒടുള്ളൂ. ഡൽഹിയിലെ ഈ മോഡേൺ സ്ലേവറിക്കു കളം ഒരുക്കുന്നത് അടുത്തുള്ള സംസ്ഥാനങ്ങളിലെ ദാരിദ്ര്യവും വർണ്ണ ജാതി വിവേചനവും കൊണ്ടാണ് . നരകം വേണോ അതോ നടുക്കടലിൽ മുങ്ങി ചാവാണോ എന്ന് ചോദിക്കുന്നവനോട് അവൻ നടുക്കടൽ മതിയെ എന്നല്ലേ പറയു. അത് കൊണ്ട് ജുഗ്ഗികളിലേക്കു ആൾക്കാരെ കൂട്ടാൻ ബ്രോക്കര്മാര്ക്ക് കഷ്ട്ടപ്പെടേണ്ട ഒരാവശ്യവും ഇല്ല . പണിക്കാർ ഇങ്ങു ഒഴുകിക്കൊള്ളും , കോമ്പറ്റിഷൻ കൂടുമ്പോൾ കൂലിയും കുറയും. എല്ലാത്തിനും ഉപരി ഇവർക്ക് വോട്ടവകാശം ഇല്ല അത് കൊണ്ട് ഇവർക്ക് വേണ്ടി ശബ്ദം ഉയർത്താൻ ആരുമില്ല. ക്യാപിറ്റലിസത്തിന്റെ ഒരു വൃത്തി കെട്ട പരിണാമം. ഓരോ വെക്കേഷന് പോകുമ്പോൾ എനിക്ക് ഉറപ്പായി കേരളം ഒരു സ്വർഗ്ഗം അതിൽ കമ്മ്യൂണിസത്തിന്റെ പങ്കു ചെറുതല്ല എന്ന് .

ഇന്നിപ്പോൾ കൊറോണ വന്നപ്പോൾ ഈ ജുഗ്ഗിക്കാരെ ആർക്കും വേണ്ട . റിക്ഷകൾ വേണ്ട, ഇസ്തിരി വേണ്ട , പാത്രം കഴുകാൻ പറ്റില്യ അങ്ങനെ അങ്ങനെ. കൊറോണാ മനുഷ്യന്റെ വൃത്തികെട്ട മുഖം കാണിച്ചു തന്നതിൽ ഉപരി ഇത് പോലത്തെ ചില ജീവിതങ്ങൾ നമുക്ക് ചുറ്റും കഷ്ട്ടപെടുന്നുണ്ട് എന്ന് ഓർമ്മിപ്പിച്ചു തരുന്നു . ഇത് നടക്കാൻ തുടങ്ങിയിട്ട് 50 കൊല്ലം എങ്കിലും ആയിക്കാണും. കൊറോണ മൂലം ഡൽഹിയിൽ മരിക്കുന്നവരിൽ ഉപരി പട്ടിണി മൂലം ആയിരിക്കും കൂടുതൽ മരണം എന്നൊരു യാഥാസ്ഥികതയും ഇതിൽ ഉണ്ട്. അതാണ് ഞാൻ നേരത്തെ പറഞ്ഞത് ഇതിനു പരിഹാരം കൊണ്ട് വരാൻ മോദിജിയ്ക്കോ കെജ്രിവാളിനോ പറ്റില്ല , ഇവർക്ക് പിന്നിൽ ഇരുന്നു ഈ സിസ്റ്റം അഭ്യൂസ് ചെയ്യുന്ന എന്നേയും നിങ്ങളേയും പോലുള്ള ഒരു പൊതു സമൂഹം ആണ്.

കൊറോണ മൂലം ഇവരുടെ യഥാർത്ഥ മൂല്യം സമൂഹം തിരിച്ചറിയട്ടേ അവരുടെ ജീവിത നിലവാരം മെച്ചപ്പെടട്ടെ എന്ന് പ്രാർത്ഥിക്കുന്നു. സർക്കാരുകൾ ഈ പാവങ്ങൾക്കുള്ള ആഹാര സൗകര്യം എങ്കിലും ഏർപ്പാട് ചെയ്യും എന്ന് പ്രതീക്ഷിക്കുന്നു.

~ എല്ലാം ശുഭം ആവട്ടെ ~